Nj評 《今個聖誕無銀用》－笑到反肚

既然電影裡面粗口橫飛，我都唔怕正式宣布，呢套戲真係好戇鳩但係又好好笑！呢類型電影好難去寫什麼影評，亦千祈唔好諗住有咩人生大道理，只要夠輕鬆好笑就係好戲。好肯定話俾大家聽，真係笑到我好開心，又好有聖誕氣氛，真係要推介俾大家遲啲聖誕節去睇。戲裏面有一大班人物，每個人都好出好深刻，最正當然係Kate McKinnon飾演的HR，完全諗起公司裡面果班又煩又多規矩嘅HR阿姐。

一路我都覺得，拍笑片真係好難，節奏掌握好演員揀得啱絕對唔比其他電影容易。戲裏面有少部份笑話我諗未必香港人容易聽得明，又有超多抽經典電影水嘅對白考驗觀眾電影知識，不過剩低落嚟超大部份都係易明又好笑。記住唔係誇張演繹扮好笑果種，係對白真係精景好多時一個短章節情景兩三句對白已經笑到反肚，仲要非常密集又能夠貫穿故事。對比起之前極受歡迎的《死侍》，《今個聖誕無銀用》的亂噏爆發程度可以話遠遠拋離。諗返起，驚喜程度拍得住《#囧探出更》《#超低能王》。編劇實在犀利，留意返，Jon Lucas跟Scott Moore兩位編劇亦都就係《#醉爆伴郎團》的編劇，你可以想像到件事有幾喪幾癲幾瘋狂！

80分
文：Nj－－－－－－－－－－－－－－

░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿－分享交流！

－－－－－－－－－－－－－－