【#Nj評::〈G殺〉】好鍾意

講明先，《G殺》我在12月尾已經睇咗（自己俾錢，拜託唔好標籤我咩"電影kol黑社會"+"收利益"），當時無刻意去記低細節，到今日寫這篇短文的時候已經忘記了很多，會盡量將大體感受講出來。以下講嘅都是睇完當刻感覺，希望我引述例子引述情節討論就真係唔好意思。
.
個人好鍾意《G殺》
.
演員做得好，最欣賞係個組合配搭新鮮。裡面的演員其實又唔係好生面口，亦都唔算過度曝光，陸駿光楊卓娜電視見過，陳漢娜《貪狼》見過，李任燊《那一年，我17》見過。喜歡呢種好似識識地佢哋又有好多可能性睇到唔同演法嘅感覺，無定形這回事。即使有份參演的杜汶澤，見慣見熟個人氣場風格，但角色入血演出有可觀之處。內地演員黃璐，又係關鍵之所在，操半鹹淡廣東話更為角色加分，演得好好。
.
電影個框架圍繞一宗血案，其實夠商業易入口。不過的確有點散亂，尤其頭半，亦都好文青獨白feel，唔係個個頂得順。講講下亦開始失焦，跟片頭拋下的血案謎題走遠。不過往後交織趨緊密，回歸正途發展下去對案情有合理解釋，看完電影觀眾能夠理解一直鋪排的線索。
.
雖有商業元素懸疑故事作引子包裝，電影重點始終還是注重建立人物－一班走在邊緣的人。我沒有特意以政治角度去理解，純粹當作是社會眾生相，生活在我們身邊的這些角色交流足夠精彩，互有關連，劇情豐富。各崗位一輪又一輪交手，最後發展至血案悲劇。
.
最有趣最有實驗性質的絕對是剪接，利用幾十個G開首單字作分章分節。這個手法又係未必人人受，亦都其實有取巧成份，如此剪接有助拼湊那一大堆散亂畫面，但認真想可以話係不負責任以創新為口號忽略畫面連貫。可圈可點，睇你係舊派還是新派觀眾，接收能力有幾高。個人來說，最初頭有點不習慣，後來看熟都覺得是有心思的好嘗試。不過，往後請不要以此為常態。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::〈Marvel隊長〉】有人話太公式，我話輸在無跟公式

〈Marvel隊長〉帶領MCU進入新紀元，新局面，就連Marvel死忠都頂唔順，鬧埋一份。嗱... 認真，套戲就一定唔係拍得好，但我又唔覺得威力大得足以引來如此強度負評。個人感覺平平一般，看完好似無看，出戲院便忘記。純粹如此，評得不算辛辣留有下台階。一直想，問題在哪？問題係無跟公式。
.
由2008年《鐵甲奇俠》起便定下英雄起源電影的公式：總有個恩師，唔知點解戰死，佢生前對主角有所負託，改變主角日後行事做個頂天立地男子漢。除了風格極濃極另類如《銀河守護隊》外，套套基本上都一樣。即是話，無能力無信心玩驚喜，只要跟實拍至少一定冇死。個重點係主角經歷電影大事件後的改變，鐵甲奇俠由自負掌握愛，奇異博士發現自己之渺小，連評價最差的雷神都學懂神不是萬能。但Marvel隊長由頭到尾再思想上都無改變，應該話沒有激發她"轉死性"的事件出現，講白點是角色描寫平面，是編劇的錯。
.
再加上敘事方式次序非一般，再次屬脫離公式之錯。其實為新作注入敘事新意絕對是好事，《叛諜追擊》般失去記憶尋找身世之謎理應引人入勝，但找尋過程可謂十分兒戲簡單，中途竟然出現一個震驚13億人的plot twist。屋仔內Skrull族首領突然和藹現身實在十分奇怪，穿得像牧師口水多過茶，原來是暖男一名的真相難以接受。不過之後的部分反而更好看，倒不如由頭開始便作如此設定簡簡單單可能更可觀？而大奸角Jude Law簡直是太浪費，本來他與女主角的情義已經沒幾多，中途由忠轉奸無令人可惜之處，對引起Marvel隊長的情感掙扎矛盾轉變完全無效。
.
而《Marvel隊長》最令人過目即忘的原因是，沒有任何一部份做得極致。觀眾容易把焦點放在Nick Fury身上，甚至係隻貓，都不想多理解主角更多。我們知道劇情發展下去都沒有再多進展，驚人身世只發生在恩師Mar-vell，主角的背景仍然模糊。未上映至上映後，大家都係咁話這是一部女權電影。唔好意思，完全唔覺。只是一部女人做主角的電影，女權意味是零。連本來要達到的議題目的都做不好做不盡，好難讓人認受為成功作品。動作場面可謂避重就輕，CG都少用，感覺是相對低廉的超人戲服拳頭交加洛克人炮拳。個人覺得麻麻地的奇異博士仍起碼有精彩的幻術靈魂出竅打鬥，Marvel隊長在這點上都被遠遠比下去。
.
至於女主角選角Brie Larson，都可以話未盡極致一例。講靚，講獨特，真係不敢恭維，豪不起眼。有人反擊，主角Carol是軍人當然是這樣。大佬，拍戲呀，尤其是英雄片呀要有魅力呀，那Marvel當日又選擇Chris Evans做軍人美國隊長？唔靚不起眼，又唔代表我認為選錯Brie Larson。點講佢都係奧斯卡影后，Room裏絕境堅強又溫馨的母親演繹有幾出色有目共睹，再見她近來充滿活力出席戲院謝票活動笑得幾咁靚，好肯定她絕對能有所發揮，導演指導得好的話。問題便是出在導演身上，怎麼安排她由頭到尾都怒氣沖沖的樣子？是甚麼創作理念？124分鐘同一個不討好的黑面，破壞電影，破壞演員，真係難為了家嫂。
.
×☝🏽☝️☝🏼多謝投稿！有嘢想講，都歡迎各位投稿分享你嘅睇法～×
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::〈流浪地球〉】睇過先有資格批評。無你想像中咁差

近排興講《流浪地球》，個潮流係由一大班似乎睇都無睇過的場外觀眾點評，用不同方式製造花生冷嘲熱諷，非常熱鬧。咁好玩，搞到我都想加入討論，我睇過，我真係入戲院睇過。鼓起勇氣，作好被批鬥準備。點解咁講，因為我打算俾正評這部電影，這部被譽為『絕對不能正評的大陸電影』。

.
特技，的確非常利害，質與量都達荷李活水準係不爭事實。比得上Alita？肯定比不上，還跟高水準有一段距離，至少不嚇人，有心做，足夠表現電影裡的世界。開頭都有少少不習慣這種特效畫面，與我們平常見開的有些微差異，但一段時間後適應到，睇得舒服。車輛服裝設計一切都很精美，只是地下城還做不到那種真實。這部分應該是拍攝棚實景搭建，光線假假的，不夠污糟廢鐵感。
.
故事，正常，我並不是精密科學追求者。只是不明白點解如此大project竟然會計漏木星條數搞到差點世界末日... 很多劇情都說了算，故事背景沒太多問題但說故事技巧絕對有很大改善空間。基本上吳孟達出事之前，可以有很大篇幅去寫人物但明顯失效浪費，角色之間交流不足，很平坦的敘事有悶場。出事後好似為電影打下強心針，目標頓時明確好睇返好多。基本上結局個救世計劃係聽唔明睇唔明，各人分工都混亂，但有一大堆看似刺激的事要處理... 有一班人推推推推推，有一班人清除某個障礙，有一個人負責演講，有一個人負責server房... 大概如此，結合這些便可以救世。至於點樣運作，都係完全放棄理解算了。加上電影的剪接異常混亂，眨一下眼危機就突然出現，未夠清晰鋪排，但又唔知點解睇得十分緊張哈哈哈。
.
大中國，唔好意思真係感受唔到，反而我睇到電影盡可能加入不同國籍落故事之中。你要話政治正確，就肯定不是中華民族主義行頭的政治正確，反而是普世包容的政治正確。我知你又想笑吳京做太空戰狼，不過我話你聽他只是特別演出，戲份出奇地少。與他執行任務的是俄羅斯人，聯合政府代表亦不是說普通話，最後多個國家隊伍合作去盡地一煲，看到這種安排絕對係有驚喜。至少，看不出那種『若不是中國，你們早就...』的意圖，要放棄這個『宣揚國威』的大好機會其實真是個非常難下的決定。至於有人堅持話用中國人做主角救地球就等於大中國，我都無咁好氣，難道叫大陸投資者找外國人來主演咩... 很合理吧。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::〈#死亡無限2次LOOP〉】聰明處理loop多次。仲好過第一集

假如我給《死亡無限loop》70分，續集就有80分

好難得呀，續集個感覺仲好過第一集
首集開咗個好頭，收得完整，過程有趣
係差在無限loop，loop到有個位覺得多得滯
產生輕微厭倦感覺
.
今次呢，唔同喎，基於上集情節玩出變奏又唔係炒冷飯夠精彩喎
開頭玩另一個上集大茄，另一角度loop返兩round先過下癮
順便介紹新人物，解釋埋上集起因，引發出今集新旅程
話新又唔係新，基本上都係上集setting但有些少微妙變化
所有上集人物關係都砍掉重練，重新認識
唔好話個主角黑人問號，連我都覺得有點燒腦
但真係要大概記得上集劇情入場先可以好好享受
感受下編劇如何在框架下洗牌用創意製造新驚喜
上次驚慄懸疑探案感比較重，今次青春輕鬆科幻歷險味較濃
電影裡面提到回到未來，講真係有陣相類似感覺
.
相似的大橋在電影史上出現不少次，但談得上精彩的相信不多
今次難度係接近重複上集劇情人物
但加入科學觀令到件事更加實在豐富精彩，仍然帶到新鮮感俾觀眾
提醒返要求有根有據科學理論的朋友千祈唔好睇
驚你覺得唔真實唔開心，諗住睇套喜劇但破壞美好一天就唔好啦

.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::〈LEGO英雄傳2〉】拍得住首集咁熱鬧好玩爆笑洗腦

The LEGO Movie 2 : The Second Part 實在好睇得過份。話說這半年有兩部續集動畫極度期待：〈無敵破壞王2〉與〈Lego英雄傳2〉。前者，其實有啲失望，唔係唔好睇，只係回歸俗套欠缺創新。但後者，精彩創意教育性拍得上第一集，由頭笑到尾，意念上有所延伸，下年奧斯卡仲夠唔夠膽唔俾佢入圍5強？（講開LEGO Movie一定要鬧一鬧奧斯卡）
.
以LEGO電影系列來講，過去兩部蝙蝠俠及忍者都只係每況越下，唔多好睇。今次叫做回歸正傳拍續集，繼續有Phil Lord同Christopher Miller拍檔編劇，即刻醒神有生氣！首集插入的現實場面為電影加添新鮮感，更加係將意義表達提升幾個層次。今次繼續咁玩，有更加多現實場面，帶出更多玩LEGO背後的樂趣。上次係Master Builder，今次係Master Breaker做對比。由LEGO應該自由發揮創意還是應該黏合成藝術擺設，延伸至獨樂樂不如眾樂樂，個概念好比我們上年愛爆的〈挑戰者一號〉，玩樂都不忘初衷，沒有最好玩只有更好玩。
.
更重要的是，故事發展繼續出乎意料跳脫，創意情節令人笑到停唔到。繼續有大量密集笑話，假如你對電影都有幾多認識會投入度100%，識得笑其實好好笑。《正義聯盟》，新舊水行俠，幾個LEGO版本系列的同一角色，最正係連布斯韋利士標誌性演出都玩埋，仲要講足三次都仲笑得出！更加不可不提的是歌曲，上回都不覺得如此密集只記得洗腦神曲Everything is Awesome，今次瘋狂唱歌，延續洗腦風格歌詞又超配合劇情。歡樂程度似以前的迪士尼動畫，又開心到有少少令人心寒夾到女皇的神秘身份感覺。主題曲以外，〈Catchy Song〉(The Song That Will Get Stuck Inside Your Head....)再次極級洗腦，〈Not Evil〉聽到不寒而慄，〈Gotham City Guys〉笑爆嘴蝙蝠俠fans必鍾意。仲有最緊要，〈Everything is Awesome〉竟然結合〈Catchy Song〉成為變奏〈Everything’s Not Awesome〉感動熱血！兩首歌一脈相承，痛苦中保持自在快活，絕望中拒絕放棄，喜從悲來成件事再次昇華！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評: 〈 銃夢：戰鬥天使〉】跟《阿凡達》一樣無乜特別好睇

個個讚到咁，我睇完又唔係話覺得唔好睇，只係可以講一般啦，冇乜特別啦。請大家別再吹奏占士金馬倫，他確實在技術上貢獻良多，但本作與阿凡達一樣，劇情死板結構公式，實在說不上神作，以下是個人一些觀感總結：
.
世界觀之類在這個時代不是十分特別，電影呈現上似District 9導演《極樂世界》。
.
類似反叛抗爭結構故事好易爛尾。eg: 飢餓遊戲 ／ 移動迷宮。本集避而不談，往後不睇好。這次小結尾到喉唔到肺，不痛不癢不爽。
.
期望moterball會好特別，似哈利波特魁地奇有一種獨有規則，點知都係加速版籃球運動。
.
劇情整體一般，喜歡前段女主角蘇醒，觀眾跟她一同探索世界，食朱古力，食橙，睇到心理變化。但後面男主角無腦奇怪舉動翻白眼，醫生老婆突然母性大發，關鍵位成功瞞騙睇唔明講唔通。
.
男主角不討好，個樣一睇就好似90年代造型的街邊死𡃁仔，見到都想打鑊佢，有咩可以吸引女主角？
.
劇情強行推進，特意安排女主角得到新裝甲屬純功能性情節，實質異常兀突。其餘劇情都係屬於精準計算框架之內，公式化，沒有驚喜。
.
美術最為值得讚頌，演員與CG沒有違和，大眼但五官比例合適，角色形像武器設計一流。
.
浪費嘍囉老大黑人演員，他在《綠簿旅友》表現超班，理應屬影帝級數。負責Alita動態捕捉的女演員無敵，把表情動作少女心細緻呈現。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評: 〈 王者之後：重拳復仇 (Creed II) 〉】悲劇對手完全搶過主角風頭

好可惜，〈Creed II〉在港上映一星期之後大幅減場，身邊有朋友想睇都安排不到時間。香港來講聲勢都似乎非常弱，只有網上fans在圍爐討論。小弟不能說是Rocky粉絲，慚愧地，實情我一集Rocky都未看過。話說〈Creed II〉之前一晚，臨急即睇〈Creed I〉。果然犀利感動到我，音樂／故事／演員都非常合我胃口。然後看〈Creed II〉，都幾好睇喎，得到如此低迴響認真可惜。
.
不過你問我，還是喜歡第一集多一點。〈Creed I〉件事比較陽光熱血，力爭上游打出自己一片天。〈Creed I〉就黑暗得多，心底出發點都係基於仇恨居多。好彩叫做寫多幾個原因去合理化上擂台原因，講得通多角度夠細緻，純粹不及前一集直接正氣。Rocky系列fans一定特別有感覺，完全係第四集的下一世代續篇。連我這些閒人都很容易受到感動，不難理解世代之間造成的破裂，得承認在故事上做到成功且吸引的鋪排表述。電影中的悲劇敵人完全搶過主角風頭，觀眾應該會更關心兩父子這些年的艱苦歲月及心底累積的壓力。故事上在此描寫不足，捉到鹿唔識脫角略為可惜。
.
史泰龍最後一次演Rocky，有幸趕上尾班車及時在大銀幕觀賞。〈Creed〉系列兩集都拍得幾好睇，已上軌道算係接棒成功。不同角色後代相繼出現，可看到真係有排玩，不過希望不要再擴大家族恩怨情仇講Creed個女Creed個孫Creed的後代跟以往的敵人後代瘋狂對打。反而，你拍番蘇聯佬兩父子外傳我更有興趣。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan