【#Nj評::〈肥龍過江〉】精靈起勁肥仔葉問

真話係難聽，不過都要講。《肥龍過江》應該都可能係今年幾部華語賀歲片之中製作得最認真，最有質素的一部。我知，有王晶投資、有王晶演出你唔想睇，OK無逼你，我只以戲論戲聽我講埋先。套戲其實不是王晶導演，他是編劇，而我都真係覺得劇情幾唔掂。導演是日本人谷垣健治，甄子丹師弟，多年來已經跟開丹爺搵食，做開武指今次終於擔正做導演。套戲好睇在甄子丹可以自由奔放地大打出手，配上80年代港產動作喜劇模式，一路打一路好笑一路緊張，把港片最光輝歲月還魂的作品。
.
劇情，真係得啖笑。你看簡介會話你聽甄子丹飾演的香港警察負責押送犯人回日本，返到去原來個犯又同日本黑幫毒品有關，之後丹爺便無啦啦捲入一場風波，講到好巴閉。Bullshit，根本可以完全無視以上設定，總之是但求其找個理由讓甄子丹走到日本打打打，最後其實都只是英雄救美。奸角其實都沒有背景可言，而在日本認識的香港人王晶與毛舜筠，和主線沒有什麼關係，所以主角以外的人物關係建立很差兼多餘。尤其王晶今次演情深認真之人，個感覺唔適合佢，可奪最差演員獎，都係做返屎尿屁肥螳螂搞笑最好。反而甄子丹與周麗淇兩位，一頭一尾的情侶互動好睇有趣，更多戲份都沒有問題（利益申報：周麗淇是我中學年代的女神）

睇呢套戲，發覺有錢真係萬能。有錢，可以在廠房內搭一個歌舞伎町景，好似當日《72家租客》的西洋菜街。然後很多戲份都在裡面拍，包括兩三場追逐打鬥。歌舞伎町景始終望落去都差少少質感，亦比真實縮小，但細節設計很好。整個街道樓宇規劃都為追逐打鬥而設，好讓丹爺爬上爬落跳來跳去，善用街頭物資攻擋非常好玩。有錢可以把特技完美融入打鬥場景但不察覺，包括首場車廂及尾場東京鐵塔。好似置身其中般打，但係你明知道無可能真的爬上東京鐵塔以此角度拍攝。當你看過《P風暴》尾場直升機及《九龍不敗》，便會知道劣質特技是如何趕客，但《肥龍過江》的CG背景與演員搭景好夾，不令人出戲真真正正可以專心睇動作。當然，幾多錢都好導演唔得乜都假，今次擺明導演落足心機，錢銀技術又支援到才有好結果。
.
睇丹爺演葉問太多，經常垂頭喪氣為老婆仔女民族憂心，打交都係迫於無奈咁款。但在《肥龍過江》我看到精神飽滿，精靈趣怪的肥仔丹爺，俾人打低好快便起身再打過，越打越痛快、速度奇高不停向更極限挑戰。加上幾場大龍鳳有車廂困獸鬥、東京街頭追逐、鐵塔大戰，豐富精彩睇到人好醒神。劇情編得不好係事實，但又無話拖垮套戲，所以夾硬放大缺點係不必。動作場面大幅度搭救，丹爺另類起勁演出，有驚喜，好看的戲係要讚。
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你帶頭！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*緊貼【 電影狂人-影評情報交流平台 】獲得最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::〈怪醫D老篤〉】睇到我想D佢老篤

其實我包容度一向都好高，好少有套戲可以令我如此難頂

一路睇，一路好唔耐煩，不停問：究竟幾時完？
兒童向無問題呀，都唔係幼童級數呀嘛
起始用故事書方式去引入，已經定下方向，然後變真人越拍越衰
像圖書館裡面一頁得20隻字、Font Size 72那種呃錢兒童繪本質素
大佬呀，現在電腦動畫即使是傳統老土公主片都可以拍得老少咸宜
為何一部用大明星兼密集CG大製作的電影可以拍得如此難看？
.
基本上電影裡接近每一件事都錯
演繹錯，每個角色都似卡通人物
講對白方式誇張低能，下下奇怪口音chok聲，聽到好辛苦
RDJ理論上不會演不到這個角色，但我覺得他有資格奪得金草莓獎
要論怪雞角色，尊尼特普真係贏兩條街
又咁講，每演員都出現演技危機，似乎是導演指揮有問題
.
劇情、節奏大錯特錯
我都無要求什麼驚天情節，但都不要拍得如此無味道
應該驚險的不驚險，應該好笑的不好笑，人物關係完全是零
我睇〈怪獸與牠們的產地〉都見到主角與怪獸交流合作真摯
但D老篤與動物朋友各自各，完全看不到之間感情
所有角色都自己演自己，零交流，閃閃縮縮
無足夠機會讓他們互動交戲，講一個簡單故事都有困難

故事想講主角老婆過身，孤零零，從此封鎖自己，只接觸屋內動物
怎知道有個同樣具動物傳心潛能的細路使他融化，最後釋懷重新生活
以上是本來想講的道理，聽落都幾簡單公式，難唔到荷里活導演啦
怎知令人厭煩程度，同《棟篤特工》有得比，計算全錯
自以為好好笑，要演員滑稽浮誇演出，應該BB先識得欣賞，5歲以上都覺無聊
我隔離位開頭都笑兩下，然後熟睡，夾硬吱你笑衰過港式群星賀歲片呀
睇到好尷尬呀，當觀眾低能白痴，唔好要好演員出醜啦好嘛
.
故事無味道，每個場景都極局限、無想像
太順理成章，無啦啦到達，無啦啦完成任務，無啦啦釋懷
無危機、無擔心、無緊張、無解決、無鬆一口氣
影像上想做到大世界，但俾人覺得每幕背景都只係廉價CG
好懷疑演員出外景究竟有幾多場
特技又不做得特别好，動物跟演員有距離感
最後D老篤幫某特别生物做手術只是借位便算
CG細節整都廢事整，慳水慳力慳功夫
咁Hea，不如唔好拍啦
〈怪醫D老篤〉有機會係農曆年最伏電影
等埋〈家有囍事2020〉，就可以真真正正分高下
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你帶頭！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*緊貼【 電影狂人-影評情報交流平台 】獲得最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::〈我的筍盤男友〉】比起《乜代》... 技巧純熟流暢似番套戲

其實我一直無睇葉念琛啲戲，包括學生時代最盛行方力申鄧麗欣主演的幾部，都無睇。直至大家笑佢係MK活地阿倫，兩年前，睇過賀歲片《我的情敵女婿》，好驚喜，真心覺得好睇。但係果時，睇過嘅人都冇乜邊個夠膽認，驚俾人笑呀，尤其當時撞正黃子華《棟篤特工》。兩年後今日，葉念琛再次大戰子華神，《乜代宗師》要撐唔鬧得，《我的筍盤男友》似乎都未必會受重視，不過葉導演最近竟然被冠『紮根香港多年』，一個只拍港產片的導演可能幫到票房。

.
講下套戲，雖然以賀歲片檔期形式上畫，不過跟《乜代》一樣完全無賀歲味，唔會似《家有囍事》最後跟你說恭喜發財。格局係前段笑片，胡鬧好笑都睇得幾開心過癮，後段側重愛情。睇得出葉念琛對於駕馭愛情片非常純熟，劇情流暢。不過就是一般愛情片，都係嗰啲嘢，沒有什麼驚喜，不像前作《女婿》出色。高富帥配街邊妹妹仔，可能迷開韓劇的後生仔女會喜歡，我一把年紀便沒有太多感覺。身份地位懸殊，係套戲想講嘅嘢，可惜我自己無錢代入感就唔係好夠，充滿幻想的年輕人應該會比我看得肉緊。諗諗吓，又有啲似細個睇台版《惡作劇之吻》，袁湘琴一定要夠戇鳩先正。結局一場，靚嘅，浪漫嘅。

演員方面，導演講明特登邀請大量新演員演出。諗法絕對係好，不過他們部份未夠能力去交功課。岑珈其一直是我心中的好演員，有喜感夠生鬼。孫慧雪唔後生，對比再年輕很多的女主角李靖筠演技真係成熟很多。李靖筠的演出好有改善空間，形象上其實非常切合角色（可能因為星味唔夠），講對白都幾唔自然。做配角可能OK，女主角就... 陳家樂演高富帥，高、帥都齊，但未有富家公子貴氣，不過唔差。最令我喜出望外係原來有我女神倪晨曦，還要是一個非常之重要的角色，好靚呀痴線，雖然只得三場戲，但真係關鍵性地重要，我所有的目光已投放在她身上，完場真係想再入場淨係睇佢一個。
.
睇完今套《男友》，我終於明白點解我愛《女婿》... 勝在演員。武則天跟卡士蘭，兩個老戲骨，每場戲都演得充滿靈魂，兩個老嘢重拾舊愛無讓人反胃，反而有點命運兜兜轉轉的憐惜。還有，衛詩雅年輕得來，真係交到好戲。要人支持港產片，資歷淺的年輕演員，需再加努力。假如要我把《男友》跟《乜袋》比，我揀前者，娛樂性強接觸面大，技巧純熟流暢似番套戲，都真係好緊要。
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你帶頭！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*緊貼【 電影狂人-影評情報交流平台 】獲得最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::〈乜代宗師〉】好睇過〈棟篤特工〉大概二百幾倍

我唔係黃子華fans，覺得上集〈棟篤特工〉爛到無得再爛，咁都收四千幾萬真係黑人問號… 放心，〈乜代宗師〉好睇過〈棟〉大概二百幾倍，叫做起碼個flow係順，故事都叫做係有而且成立，簡單老土無驚喜，但我收貨。不過以賀歲片去睇，我唔覺得有幾好笑，亦唔覺得黃子華的演出有幾精彩。情況似占基利，做來做去同一個滑稽誇張樣，係會厭、會煩。你是子華fans當然想看他繼續這樣，我不是，所以我看得多便覺累。

.
聽講話套戲在大陸拎不到批文，其實我又唔明有咩意識如此敏感。講來講去，都係“上善若水”，都係傳統中國文化，咩形狀水都可以改變形態去適應，做人做事要識走位，有咩問題？唔通就因為類似Be Water的對白？唔知。只係想講，其實所謂訊息真係講到出口，重覆之餘白到無得再白，以戲劇來說係不合格，沒有活用到故事影像去傳遞，寧願佢搞多個talk show直線抽擊好過。

反而電影中的配角可以話撐住整部電影，Benz雄最大功勞，喜感不減又帶住一眾對手做戲。我一向麻麻地的專家Dickson原來好重戲份，飾子華的兩大弟子之一，對白算係度身訂造，演得又好笑過主角好多。就連離開TVB發展的羅天池也有驚喜表現，原來他本身懂拳擊柔術，切合戲中角色設定。
.
新年，有時間，我絕對不反對大家狠狠地去懲罰。因為真的不可以話拍得差，正常，我後面幾位觀眾都笑得幾開心。我自己笑兩聲，睇完感覺不大，唔差又唔係好好，但可以睇下。
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你帶頭！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*緊貼【 電影狂人-影評情報交流平台 】獲得最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::《1917：逆戰救兵》】製作特輯肯定好睇過套戲

〈1917：逆戰救兵〉製作上係無得彈，你一定要事前知道電影是一鏡直落拍法先好入場，去享受整個團隊如何展現這個高難度要求。看時你係要不停問自己“究竟如何拍？”，個鏡頭好似可以隱身，明明架車塞滿人都上到去攞位影到幾個角色傾計，明明戰壕好窄但演員同攝影師可以換位自如經常有不同角度，明明一大灘水部攝影機又可以在水面順滑平移再拿上拿落不留痕跡。你知道無可能真正2小時一鏡直落，花心機去找尋那些巧妙隱藏的剪接位也是好玩之處。

在布景的設計上也是做得一絕，初頭戰壕一段尤其精彩，行極都未完，究竟個景有幾大幾長？景與景之間又如何連接？主角像鴨仔團般在2小時內一氣呵成到過很多地方，實則有幾多個景點是真正在附近？不知道，製作特輯肯定好睇過套戲，網上的12分鐘版本又怎夠滿足我們的疑問。講多句，這完美演示電腦特技用於高度實感的電影，最強的CG是用了都看不出來。看IMAX版本也是十分推薦，我一向不太祟拜話套套都要看IMAX才好看，但這部絕對有對整個體驗大加分，投入欣賞技藝是這部電影最重要的一環。

拍得上〈雷霆救兵〉？不，我不認為。強實感但始終故事精彩度是不能比擬，反而像〈鄧寇克大行動〉，靜多打少。大場面trailer已睇盡，細打的時候都可以好緊張因勢孤力弱觀眾又置身其中，無打齋行搭車的時候又其實可能會悶。Dunkirk有路蘭大名加持，甚麼也是美好的，本部電影又走類似“話佢無娛樂性不是但話佢好高娛樂性便更加不是”的路線，不知一般觀眾會怎樣評價。所以個人還是最欣賞前半段，長長戰蠔面對未知危險處處殺機，爬過無人地帶更感壓力，靜得來好像下一秒總有事會發生。中段打後對白更少，更多內心戲，入城以外感覺偏安全開始令人提不起精神，放工累了有點想睡… 放心，我無訓到。
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你帶頭！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*緊貼【 電影狂人-影評情報交流平台 】獲得最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::〈星球大戰：天行者崛起〉】導演J.J.Abrams是真正為原力帶來平衡的人

要處理星球大戰難，為星球大戰寫下結局更難。導演J.J.Abrams的重任是要為自己啟動的後傳收尾，更加為42年來的發展留下傳奇，最吃力不討好是平衡星戰迷與一般觀眾的期望，他做到了。拍一部電影不能只為固有粉絲服務，好表面好簡單地說，一般觀眾要求不外乎刺激熱血搞笑，總之是要非常的高娛樂性。無間斷的飛船追逐，尋寶奪寶，大量光劍戰鬥，可愛小動物，C3PO重點搞笑，豐富到盡頭，包羅萬有要你開開心心。至少不會像上集跟你講人生道理，悶親街坊。相信一般觀眾不太尋求探討那些家族血淚史，對太多理論性及星戰傳統未甚興趣，滿足到官能刺激經已等於分辨好看與否的最重要元素。很多人永遠以自己是星戰迷身份自傲，而忘記還有一班即興希望跟隊進入星戰世界的隨心觀眾，讓他們能夠輕鬆享受也十分緊要。

至於滿足星戰迷方面，導演遇到的難度更高。最慘是人人都話自己是星戰迷，九千幾萬個分野相當大的不同看法，尤其經過上一集造成的追隨者分裂過後... 導演要把曾打算摒棄一切的Ep8修復過來已經超難喇，解釋Snoke是布偶，Rey的真正血統，Rey父母並非no one... 導演更加透過Luke道歉：『我錯了。』笑到我呢... 一切都解通了，星戰迷兩年來的憤怒可以平息了嗎？打算提倡普世價值的『人人都是Jedi』論，招來異議後今集亦再次答應你，天行者傳奇之中血統還是最重要！！令人覺得有點討厭的女角Rose，亦被大幅削減戲份，創作人已經學懂星戰迷喜歡什麼不喜歡什麼。




我欣賞導演善用到上集登場的原力聊天室，更把這個概念拍得更精采，環繞轉換場景又可以融入格劍戰鬥與線索提供，為推進劇情作了很重要的功能性作用。上集Luke放棄人生墮入頹廢生活讓很多人不解，不滿，本集Rey的前半段旅程可以話以另一角度表現出Luke曾經歷過的個人掙扎。Rey隱居的抉擇為Luke相同的下半生結局增加了層次，似乎解釋了他曾經面對的內心兩難，同樣為讓人失望的Ep8作出補救。我作為其中一位星戰迷，看到導演盡力去解決粉絲之間的紛爭，成功合理化這兩年被視為不合理不符合星戰傳統的設定已經是意料之外了。




編劇的精心設計更加為星戰迷送上聖誕禮物，一般觀眾未必察覺，星戰迷一定懂一定會心微笑。當然彩蛋不能當飯吃，不能把瑕疵遮蓋，但星戰迷總希望有些小回憶可在大結局之中進行回味，要在本已很忙碌修正 推進 收尾的劇本中插入又不顯突兀實在十分有難度。最基本的經典台詞『I have a bad feeling about this.』，Lando早已預告的加入以及Han Solo驚喜出場，歷代Jedi Voice團結為Rey集氣，遲來了42年的Chewie獎牌，Luke失落的經典X-Wing戰機，還有讓已離開人世的Leia公主自然完美的融入故事... 更多更多，不得不提一小段精心製作CG還原年輕Luke訓練Leia成為Jedi的華麗光劍比武回憶，最後Rey回到師父家鄉Tatooine洞屋懷緬... 在哪裡開始，在哪裡結束，只是想想都令人感動。這些是心意，是星戰迷看到會一陣暖流湧上心頭的安排。與一班老朋友經歷這樣的大結局，我滿足了，我收貨了。
.
【〈星戰9〉瘋狂劇透討論區】
已經有超過300個comments有問有答有傾有講好熱鬧！！！
光速入！ 連結： http://bit.ly/2ri3N3o
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 討論電影由你起頭！




*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評::《CATS》】奇差評價絕對是被惡搞，好精彩喎... 喵

外國影評劣評如潮，使到我曾經想過放棄，甚至未睇已經想加入一起恥笑

不過我錯了，不應該亂信人，只有自己親身經歷過才是真正的感覺
《CATS》絕對是一部我很欣賞的作品，會用好好看去形容
講明先：未睇過歌劇原版，一向不太懂得聽歌
.
電影在各方面都做得好好
歌舞編排，美術佈景，最為人詬病的人型貓造型我都好接受
很多批評話造型核突，的確開頭怪怪的，但睇落都算順眼
貓毛又不覺得好難頂，反而耳朵與貓尾相當活潑，這方面相信比劇場有更佳發揮
佈景道具都要有相當設計，去表現貓與物件的特殊體積比例
亦要被善用於連場歌舞之中，處處都很花心思

個人一向十分欣賞那些需要大量綵排合作的創意藝術
歌曲多樣化，好聽，是必定的
舞蹈與貓體態都好考功夫，演員表現得相當好
但你需知道《CATS》的故事線是偏弱
頭三份之一是人物介紹，世界介紹，無故事，有訓覺位
然後長老貓出現後，各貓盡渾身解數去sell自己，故事來了，精彩了
.
有幾個位可以話非常感動，配合一流的歌詞與音樂，眼濕濕：
磁力王 甘道夫 Ian McKellen演老年貓明星，訴說過去演藝的一生
像這位老戲骨的自白，你喜歡他必定喜歡這段

唱出Memory的那位，不看畫面只是聽歌都起雞皮
主角唱出為電影特意編寫的新歌一首，完美回敬Memory背後的年華逝去故事

還有Magical Cat的一節相當好看，首歌重複再重複但力量不斷加強
眾貓不停為他集氣，鼓勵，從自己睇低自己到最後做到大事




這部電影的奇差評價絕對是被惡搞
即使你可能不太欣賞這類手法，但都相信好難用爛片去形容
觀眾事前可有心理準備，故事性的確係好有限
但以去欣賞串連在特技提升加持下的大型歌舞你會感到很滿足
亦以認識獨立貓角色的背後故事，達致理解貓世界眾生相也是可觀
講到最後，我只是去看兩位老戲骨
Ian McKellen 與 Judi Dench，都已經值回票價
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 討論電影由你起頭！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan