11.26.2016

Nj評 【看〈你的名字〉心路歷程:原來動畫鬼片是這樣拍攝的】


這篇文,絕對唔想再重複〈你的名字〉有幾好睇,而係想講下我看到中段故事大幅度巴黎鐵塔反轉再反轉的驚嚇情節所產生的反應。簡單講幾句再入戲肉,不能否認畫風感覺好清新故事亦好有想像力,不過我又未去到鹹濕幾包紙巾要入場睇四五次的瘋狂程度。整體感覺算幾好,尤其配合富動感的音樂交代男女主角互換身體的生活實在精彩熱血。以上講的是電影頭一半的感覺,去到中間故事突然提升到另一層次...
原來身體互換只是前奏頭盤,為的是鋪排接下來的神鬼命運與救世主劇情。去到中段,男主角突然想找到身處地點不明的女主角,然後在圖書館資料中發現她已經過身三年...嘩!好爆!我當堂嚇一嚇,寒氣隨即湧上心口,唔係呀嘛換句話表達咪即係鬼上身?明明5分鐘前還是少男少女小清新,突然變死灰鬼片咁恐怖?仲要講整個社區的人在節日歡樂氣氛中美麗星空下一夜間集體死亡,故事來到這個位置變得十分沉重我透唔到氣,跟前面轉變實在太大。可能跟預期太不同,我原先看見海報,以為互換身體的男女主角相約在隕石奇景下首次見面團圓BBQ就完,突然開展新故事線講女主角被神明命中注定的身世實在有點反應不及。我帶著精神受創未足夠時間接受又被鬼片格局嚇親的心態繼續看下去,覺得前段舖排帶落去解釋後來劇情還可以接受,雖然其實半失憶結局真係有唔少漏洞同巧合,我都不打算反駁。入戲院前得知大量好評,帶著過高期望進場結果可惜未達到預期的震撼。不過的確帶給我另一種史無前例的獨特體驗...深深感受到原來動畫鬼片是可以這樣拍攝的。
80分
文:Nj
--------------

░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿-分享交流!
--------------



11.11.2016

Nj評〈 地獄解碼 〉



以蘭登教授為主角的系列第三集《地獄解碼》,雖然坊間大量劣評,我覺得還是不過不失。可能有定心理準備,適應了《達文西密碼》《天使與魔鬼》改編程度,自己又沒有看過本片原著,《地獄解碼》電影尚算達到預期。電影善於適當時候運用追逐橋段,主角失憶觀眾一頭煙情況下都加入大量追逐增加刺激,令人睇落整個過程都十分驚險,雖然好多時我們都不清楚追殺者有什麼目的。無論如何簡化歷史資訊,如何趕著跑checkpoint,如何極速解謎都是想像之內,有得睇歐洲靚人靚景聽下疑幻似真的歷史故事算是滿足。
三集裡面最喜歡《天使與魔鬼》,因為故事較容易改編,選教宗這類情節少接觸有新鮮感,而謎團與故事宗教主線有明確關係最為重要。可惜這次看到一個老生常談的人口爆炸清洗地球陰謀故事,再在對主謀描寫不足情況下強行連結上但丁地獄,留下一大堆線索給蘭登教授解難就顯得多餘。唔搞就好地地,越搞就越易有位俾人入。
個人不太欣賞片初主角經常閃現的地獄幻象,對現實故事基本上無幫助,好像只是為營造大片的特效示範。假如省下製作這些幻象的篇幅,對人物及謎團歷史加重描寫就可以令故事更富層次。主線故事交代時間已經缺少,還要跟隨原著嵌入副線角色及神秘組織,最後各方都輕輕帶過兩面不討好,作為觀眾我實在寧願看一個簡單富色彩的故事多於縱橫交錯富野心但控制不善的混亂四不像。
蘭登教授都算是多災多難,經常因為太叻太有學問就捲入宗教極端狂人的陰謀之中。蘭登作為符號歷史學超級英雄,還未可以收山,因為還有一部更難改編的《失落的符號》電影在籌備當中。
70分
文:Nj--------------

░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿-分享交流!
--------------




11.04.2016

Nj評〈 奇異博士 〉



有人覺得〈奇異博士〉似〈哈利波特〉又或者係〈百變小櫻〉,我話通通都唔係。劇情上係哈利波特外傳〈怪獸與他們的產地〉似〈百變小櫻〉,而〈奇異博士〉畫面上係似〈鋼之鍊金術師〉... 睇下佢,隨手郁下變法術,只是煉成陣由地下跑咗上兩隻手掌。事前幾多人抱有好大期望,又BC又Tilda又Mads成班演技派,點知劇本無得俾佢哋發揮,浪費。尤其係奸角方面,Mads Mikkelsen完全係行企閒角,我唔忿氣係因為到而家都十分回味果時〈007皇家賭場〉瘋狂揪打James Bond下陰嘅變態佬。原來Mads飾演的奸角卡撒靈大師得頭兩分鐘斬人頭果下勇猛,後來唔係逃走就係俾法寶鎖身,最後仲要俾自己老細賜死好難睇,基本上同奇異博士都唔知有冇交手15分鐘,完全冇深刻印象。所謂最終大奸角,多瑪暮,有fans好滿意因為好似好有橋靠鬥智取勝,我就覺得任佢噏以後出呢招就世界和平唔洗打。多瑪暮更加係面目模糊一pat嘢,出場極短對觀眾來說豪無深度感情,草草出場草草完事。仲有好多睇唔過眼如偽香港,至尊魔法師極速育成大法,極混亂剪接等等,都費事講。

睇到個人㷫㷫地,諗到一個方向去欣賞套戲係比較舒服,就係當佢〈 #星球大戰 〉咁睇。其實係幾似,有個魔法力好強嘅曠世奇才,去到聖殿見到好多長袍兜帽打扮嘅武士,遇到好似尤達大師般的Ancient One教導,即使就死仍以英靈方式大講道理,話俾奇才聽入唔入原力黑暗面都係一念之差,而魔法師叻過Jedi就係分別在懂得控制時間。講到呢度,個心舒服好多,因為睇咁多年戲劇情重重複複幾有親切感。成套戲又幾歡樂幾好笑,跳來跳去畫面雖然混亂又幾有想像力,收貨。


70分
文:Nj--------------

░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿-分享交流!
--------------


10.01.2016

Nj評〈深海浩劫〉-欠缺野心打造經典







近排好戲睇得多,每次打影評都讚好,自覺好似變成打手。終於終於,遇見爛片一齣可以出盡全力大踩特踩。無可否認看完trailer的確滿心期待,但結果是看得我差點訓著覺。先講本電影優點緩和一下,就是災難畫面真實,好像全程都在實景拍攝般,演員跟背景融入沒有太大違和感,餘下的都是缺點。
畫面真實都不知道是好事還是壞事,唔爆由是可,一爆就爆到成個畫面都係火。你話可能鑽油台爆炸真係咁呢,還原現實呢,我唔知讀得書少,淨係覺得以電影角度來看好無層次,無先無後。結果唔同角色就在一個紅色火光環境之下走來走去,已經忘記了場景是一個海上的鑽油台。爆前爆後爆左爆右連續大半個鐘,視覺疲累到極致,千篇一律難以感受眾角色遇到多種類驚險的不安感。有朋友問我是否爆到拍得住Michael Bay,我話唔係,還要差很多,Michael Bay的爆炸至少有種具層次的美學原則,只是開始有點走火入魔。
整套戲的節奏其實很有問題,基本上頭大半小時都是廢話連篇。就是想營造一種好安心的氣氛,所以不同人之間的對白就是冇意思hi-bye式的廢話,對往後發展沒什麼作用。雖然是災難片,我都期待前段文戲有精彩的鋪排及交代,結果沒有推進實在浪費時間。兩邊陣營爭拗應該會是核心場口,最後變成最難頂的一節。就好似教育電視,兩邊不停拋出大量技術用字和鑽油台運作理論,我欣賞做足資料搜集,但其實觀眾入場看這類電影期待盡量深入淺出,他們有興趣的話會自己看紀錄片或是Discovery Channel。原本針鋒相對可以好好發揮的情節,不單止沒有出現應有的張力戲味,反被詳細但脫離觀眾能理解範圍的業界知識拖得呵欠連場。不單止文戲失效,連重頭戲大爆破亦然。導演很想營造到明快節奏,但又缺乏劇情支持,中間就加插大量顯現裂紋爆火花支架倒下的畫面。可是這些畫面與主線無關,角色當前要面對的危險又是另一回事,配合強勁音樂節奏,感覺就只是素材不夠充斥感官要讓人覺得有事發生。
相信最難睇是人物,想不到為什麼Mark Wahlberg飾演的Mike是主角。我記不起他有什麼個人之處,沒有劇情突顯他的領導能力,又不是危急關頭作下什麼重要決定改寫事件,唯一最後一跳算是幾型(但trailer已經有得睇)。第二男主角Jimmy雖然戲份更多,但都是沒有足夠發揮。連主角都沒有好好描寫,基本上所有其他人物更是毫無靈魂。觀眾對著一班無靈魂無層次又唔知佢地背景的人物,即使是炸死定犧牲都難以有太大感覺。
打著真人真事改編旗號的電影有個弊病,劇情被現實牽制難以發展過度,最後多數變成平鋪直敘傳記。看完片末大量當年新聞片段,好懷疑導演只是想模擬一次災難現場,拍攝出一套不倫不類的偽紀錄片,欠缺野心製作新一代災難經典。
60分
文: Nj
喪杰哥 - Near Jack
--------------

░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿-分享交流!
--------------