【#Nj評《死侍2》】比上集有驚喜！更勝很多依靠浩蕩場面支撐的所謂大片

先講第一集，無特別喜歡，可能俾人煲得太大效果又唔到預期好，對續集期望一般。誰知道，《死侍2》有驚喜喎！路線明顯有調整，走正路英雄片套路再加入死侍特色風味，強化的故事發展至少合個人口味。

.
先插自己一刀，其實好多時那些悉心安排的笑話我根本笑唔出。這個問題自上集開始實在嚴重，感覺今集輕微減少好受多了，似乎創作者意識到大眾向比較重要。原因怪自己英文差，亦不完全明白參考背景，唯有這樣想。但又可以好按個人喜好批評，很多笑話出場實在太刻意了，並沒有好好融入劇情。當然你可以話這就是死侍風格死侍特色，嘴炮抽水就是一切，看看他瘋狂講話就滿足了，OK，fine，反正我就對這元素興趣一般般，還是著重流暢的故事多一點，《死侍2》明顯在該方面對比前作有所加強。

本集結構齊整，觀眾睇得舒服易跟，我唔怕你拍老土橋段，故事就是反常態地富有意義才是令人驚喜之處。想不到主角女友初段突然死亡，看落去才理解到她的死及死前與主角的對話是貫穿電影轉變心理的重要中心，使得冇乜理念內心比較空洞的死侍進化成更有意思的一個角色。欣賞電影把場景設計濃縮精彩，無論室外室內的士變種學校監獄招聘飛機跳傘劫囚車到後來的終極大戰各有特色玩得盡興。尤其喜歡跳傘一段，想不到平常動作電影裡眨下眼便降落的過渡章節可以拍得咁耐咁細，死侍好似運動評述員般對隊友加以寄望最後極大反差接近全軍覆沒笑死人，這就是改善後笑料融入情節的上佳示範。
.
另一邊明顯比上集做得好的是配角終於得到描寫得到重視。鋼人繼續一舊鐵般對不妥協的死侍付出，徹底失望過後仍然相信，最後更安排了一場大隻佬間的對決滿足觀眾。雖然炮彈頭繼續少戲份，但她帶出了我們都很喜愛的"Hi Wade"雪緒，戀愛的感覺充滿萬千男影迷。而新角色機堡都富存在意義，簡短介紹來自未來的復仇背景其實真係唔多夠喉，但他正是死侍的反照，同樣是殺人老手處理事情總有另一種方法。最終一戰拍得笑中有動人之處，死侍貫徹了啟蒙老師鋼人對自己理念的堅定去說服小孩改變未來，救世計劃的設計亦有少少《變種特攻：未來同盟戰》意味，更勝很多依靠浩蕩場面支撐的大片。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評《低壓槽》】意識流 你個頭

經過大家事前密集勸告，我運用睇爛片的特別技巧去理解《低壓槽》。還好，未爛到完全睇唔到落去，只是暴露了張家輝的導演編劇能力遠遠未達標。唔難理解張導的野心，照搬蝙蝠俠落他的電影，但實在抄到太出面要鬧要抦要恥笑，犯下我們鄙視強國無新意不重視原創複製概念的大錯。

電影畫面加上超強filter，睇到隻眼都乾埋。本來我對張家輝的長髮造型抱有好奇心幾新鮮，預告片的黑色風格亦少有於港產片出現，件事都感覺係『好認真』，但最後我發覺長期強濾鏡配低質CG真係好辛苦，只有好想盡快離開戲院。故事又係一團糟，唔係難理解佢想講乜，問題係無人物關係無表達技巧無吸引人期待下去的情節。所有所謂"意義"，全部好似港式電視劇最後講到出口白到3歲小朋友都聽得明，一時玩疑似深度一時又低級對白露底，風格配合唔到唔知想點。
.
這部電影實在太多問題，太多位值得鬧。亂咁拍，然後又有人話你聽這叫做『意識流』。我心諗... 人為了撐自己喜歡的事真係可以創作無限理由。不過都好，我欣賞他們敢於表達自己，沒有順從主流意見。以上這句唔係串咀絕對係真心，因為我在想，假如相同的作品出自Cult片大師昆頓塔倫天奴甚至是被推上神台的基斯杜化路蘭，現在大聲討厭《低壓槽》的朋友又會有什麼評價？
.
文：Nj
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評《復仇者聯盟3：無限之戰》下集】好過奧創紀元好多好多

.
.
.劇
.透
.注
.意
.【影評（上集）連結】 https://www.facebook.com/MovieMadMan/photos/a.1290143677737557.1073741828.1290025551082703/1748423581909562/?type=3&theater
.
.
.
－【英雄表現】大概分成4條線
1️⃣坐飛船去泰坦星的鐵甲奇俠／蜘蛛俠／奇異博士
2️⃣雷神／火箭浣熊／樹人
3️⃣隊長／黑豹領導的Wakanda戰線
4️⃣去腦域保護現實寶石的星爵等銀河守護隊員
.
逐條線講：
1️⃣由變形俠醫跌落地球開始，連埋王，五個人打兩隻怪都幾好睇，街頭大戰始終有種近身感覺，而奸角烏木喉說話聲調令人好想打鑊佢，能力相近亦匹敵奇異博士，好變態地幾期待烏木喉狠狠地把他折磨，造型跟低沉個性相信可以有幾大發揮空間，點知轉過頭就吸走外太空... 浪費。而鐵甲奇俠唔聽老婆大人勸告強行上太空放棄個人情感都有動人之處，但就感覺由頭到尾都跟奇異博士的演出格格不入，可能始終一山不能藏二虎，性格鮮明高傲的兩個角色係難處理少少，一係就好有火花一係就現在情況。上回蜘蛛俠個人電影我覺得麻麻地，但今次能夠發揮作用，成功運用自身能力穿梭混亂瓦礫救隊友，背部的新爪亦多次大派用場，好感有增加，結尾大叫唔想死真係感動到人。鐵甲奇俠的新戰甲實在太多變化，完全踩中我不太喜歡他的原因。件甲越搞越勁，乜嘢納米技術就可以瘋狂泥膠般搓圓撳扁，唔講以為佢係鋼之鍊金術師... 算，總有人鍾意。
.
2️⃣雷神去整武器一條線簡直係全套戲敗筆，悶到抽筋又冇特別。純粹叫做去到侏儒星見到Peter Dinklage幾有趣，個子比例小得來又是人的幾倍高，但其實整個旅程都脫離了正線劇情，不應該為已經夠多人難控制的情況下增添無謂分支破壞氣氛。什麼機器壞要人手啟動，然後雷神頂硬上的劇情好老套，又無緊張感可言，唯獨最後樹人終於放低遊戲機決心做斷臂楊過成全雷神的一幕掀起熱血沸騰。唔係話雷神唔可以去找尋新武器，但必定要直接了當唔好拖戲，跟其他故事線節奏有分野。我當然明點解雷神要搞咁耐，因為他實在太強，在戰場存在太耐只會把平衡破壞使其他人無用武之地，唯有等待兩次臨死關頭才破空而出救全家。
.
3️⃣Wakanda戰線唔敢講話特別精彩，但個意義都夠強烈：差唔多大部份人類精英一齊保護一粒石，但都係失敗收場，夠悲壯。戰場欠缺計謀，只有一個防護罩，守護人數亦看來不多，要看經典攻城戰請參閱魔戒的聖盔谷防守戰。計驚喜及氣勢，《黑豹》最後一場犀牛地底冒出仲好睇。變形俠醫死都唔出現係能夠理解有戲可做，安排班納控制浩克破壞者亦十分有趣，但變形俠醫破甲而出絕對係影迷期待已久的高潮！加一幕橫掃100敵怪實在有相當必要！可惜。隊長首次從黑暗中出場簡直型到爆裂，不過後來便淪為無謂人物... 我們看不到他有充分領導指揮，新盾牌亦沒有什麼特別，我預期會左右盾二合一或變大之類... 只有最後老友冬兵化灰，才有少少傷心戲份發揮。而冬兵那一句『Steve?』，有驚喜交到戲，悲傷感覺一直都尾。不過有少少要鬧，其中一個奸角四大天王竟然可以靜靜雞走入去係好突兀，打打下黑豹阿妹亦冇再出過場。如果復仇者要戰死，俾我係編劇就一定寫Thanos親手一拳一拳逐個KO，像他強行把幻視爆頭一樣，悲慘十倍先好玩震撼。
.
4️⃣最後係銀河守護隊大部份隊員，維持一貫亂來作風，風格繼續搞笑算係平衡了黑暗絕望的故事。他們去腦域的一場完美展現現實寶石能力，有意思，亦逼星爵收起嬉笑實現誓言親手把愛人殺掉都拍得出味道。後來去到泰坦星認識地球幾位英雄的一戰好睇，最後聯手收復Thanos各施各法直頭精彩絕倫。與奇異博士運用合體技，星爵的超敏捷身手令人刮目相看。螳螂女基本上可以話係是致勝關鍵，希望她下集仍然有所作用。無記錯那一戰是七打一，一氣呵成有咁大打咁大，叫做最接近一次把大魔頭制服。可惜作戰在別處星球，CG感特別強真實感差少少，又對觀眾有相當距離感，未能堪稱集天時地利人和的完美決鬥場面。
.
－【Thanos】在149分鐘裡面，要介紹一個全新奸角，又要照顧本來的超級英雄，我覺得導演編劇已經盡了力。Thanos算係得到大量描寫的一位，比很多Marvel其他奸角都富故事性，但始終到喉唔到肺，每樣都觸及到但不細緻。他有講到被別人誤解成狂人到最後死剩自己一個，過程呢？之後如何東山再起招攬兵團呢？他與嘉魔娜的感情是如何建立，好似好一廂情願。可以講得更多，不過限制於片長。一些劇情或短對白叫做能夠適量反應他的為人，例如他欣賞星爵敢犧牲所愛，身同感受被知識詛咒的鐵甲奇俠，看透奇異博士留手無用時間寶石，顯出他的智慧及目光。幸好演員把這名全CG的角色演得好，特技甚有質感，表情捕捉不是常見奸角的兇神惡煞，動作設計如坐樓梯都不是一般魔王霸主所為。犧牲一切事成後Thanos歸隱田園絕對是神來之筆，在寧靜中釋放心事充滿意境。
.
－【整體】爆谷片來說，我絕對收貨，至少好過《復仇者聯盟2：奧創紀元》好多好多（大家要記得第二集散收收只為鋪路）。雖然《無限之戰》都帶少少散，尤其上文提到的雷神整鎚，條條線各有各做交叉位唔多，但整體都叫做有圍曉保護無限寶石與達到Thanos人格塑造的目的。論完整性比不上第一集《復仇者聯盟》，當年首部曲故事結構清晰乾淨利落，集結過程由不和至合作都有趣味。今集文戲沒有以前Marvel電影精彩，較簡單直線亦少了歸屬感味道（美隊3的文戲最成功），很多時都要求快脆講完就接著下一場景交代，中段充斥不少速食無意義文戲顯得有少少沉悶無癮。打鬥場面略帶失望，很多時都用太快太散剪接拼合刺激感，精彩的長鏡頭在哪裡？合作技亦不多，亂得像後來的《變形金剛》，唯獨泰坦星收復Thanos一戰合作無間睇得出有計謀戰略真心精彩。
分拆以小隊上市推進故事當然屬於意料之內，英雄戰死亦有相當心理準備，觀眾仍期待他們在最後關頭會聯手奮戰，不過... 當然現在這刻粉絲們仍然可以暫時假設下集會帶來世紀連結，但以當前一部電影來說還未達到無論情感還是氣氛上的最高潮或最絕望。部分角色心理有創意角度展開，但觸到表面未深發展便繼續趕路實在可惜。需要一提的是，其他腦補或漫畫補完劇情都不能計算在內，電影就是電影。下集要背負的人脈關係及故事性更複雜，實在有少少擔心。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評《復仇者聯盟3：無限之戰》】班英雄個人感情至上點保衛地球？

以下內容可能涉及大量重要情節，你要繼續睇就唔好怪我劇透不留手...
點知越打越長... 太多想講，決定分開上下集
今次先評無限寶石奪取周邊，下次講人物同幾條故事線分佈
歡迎各路英雄盡情參與討論，讚又得彈又得，互相尊重避免罵戰，多謝合作
....倒數5....
....倒數4....
....倒數3....
....倒數2....
....倒數1....
----開始！----
.
唔係講笑，雖然我一段時間之前已經對MCU沒有太多投入，而感覺最近期上映的《黑豹》好一般（想不通為何如此高票房🤷🏻‍♂️），但我仍然對《復仇者聯盟3：無限之戰》抱有相當期待態度，特意走到機場看IMAX 3D版本，睇之前緊張到有少少作嘔，事關我相信兩位導演羅素兄弟，他們把MCU美國隊長從險境帶上高峰，形象何謂更勝大受歡迎的鐵甲奇俠。本集的宣傳重點相信大家十分清楚，阿媽係女人的『十年鋪排』『最強集結』係唔足以表達電影的成績，不如直接進入細節逐點講利弊：
.
－【開幕】Thanos控制聖域界太空船打低雷神與洛基一場拍得相當好，好快令到觀眾入戲，Thanos霸氣盡現。估唔到有得睇變形俠醫可以 1 on 1 同Thanos隻揪，基本上旗鼓相當，只敗於力量寶石之下，係非常爽。但估唔到惡作劇之神洛基在電影開頭已經死亡（真死？假死？），而他多次以為可以刺殺Thanos其實係弱智...
.
－【無限寶石】
力量寶石與現實寶石被輕易奪得係意料之內，人類負責守護時間寶石與心靈寶石的安排妥當，最後的靈魂寶石反而令人失望。雖然我唔係要編劇跟足粉絲預測去置放靈魂寶石於黑豹地頭，但你經常提及的十年鋪排原來都只係吹水。靈魂寶石就如此任佢講，話嘉魔娜一早知道下落，又走去同個姊妹分享，轉個頭又同星爵表達自己好在乎這個驚天秘密條命都可以唔要。這顆事前充滿神秘感的最後一顆無限寶石原來離觀眾這麼遠這麼陌生，其餘幾顆都叫做有故事有背景，靈魂寶石給人的唯一驚喜就只是由紅骷髏所守護著，可惜紅骷髏亦不再由Hugo Weaving所飾演，rip。當我以為嘉魔娜說出地點後有什麼詭計，原來冇，高估了，她就如此理所當然地成為Thanos的祭品... wtf
.
空間寶石，心靈寶石，靈魂寶石，這三顆寶石其實都損失得相當無謂，大家都知道他們絕對不可落入Thanos手中，但偏偏這大奸角有能力令人輕易衰心軟，所謂『有能力』都不外乎是活捉親朋戚友再嚴刑拷打... 你唔好跟我說這是人性呀感情呀好真實乜乜乜，而家講緊拯救宇宙拯救世界，唔係人地要脅殺你兄弟姊妹就立即送上至寶呀嘛？還要不止一顆用這個使日常睇落好威的復仇者顯得軟皮弱智的方法奪得，我寧願Thanos係一顆一顆武力打回來！如是者，起碼我們可以睇得出復仇者們絕對微力已盡問心無愧。
.
時間寶石可謂寫得最好的一段，尤其奇異博士看過一千四百萬個苦戰結局變成一個超級萬能key，每當我們觀眾問：點解唔斬佢隻手？點解唔用時間寶石回到過去？點解唔阻止星爵發癲？包括以上我鬧的白痴衰心軟，導演都可以解釋：你們所想的每個致勝方法奇異博士早已看過，唔work，唯一work的是置諸死地而後生，像諸神黃昏的預言必須實現，命中註定Thanos一定要集齊六粒寶石摧毀一半人口，才可正式開始復仇行動。而他交出時間寶石保住鐵甲奇俠性命，不是什麼惺惺相惜友情，而是他知道那唯一的勝利機會要有Tony Stark參與，從來都沒有背棄守護寶石的諾言，有策略有計劃有意思。
.
至於展現寶石力量方面，我欣賞Thanos在戰鬥時招式運用安排。每次使用到無限寶石力量時都會閃耀，像打變形俠醫用到力量寶石，行動轉移隨意門用到空間寶石，設下陷阱引嘉魔娜落搭以及破解奇異博士多種幻影用到現實寶石，回到過去尋找幻視備份用到時間寶石，大概Thanos被劈死進入真理之門見到蘿莉嘉魔娜是靈魂寶石的效果，劇情中滲入寶石不同力量貫穿過關，係幾好玩。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan