【#Nj評《我的情敵女婿》】我想讚葉念琛大導演

賀歲片這件事好玄，平時評審幾苛刻都會俾面用返低標準去睇，最可惜係近年這種電影真係爛到幫唔落。阿叔我早前搞過投票，九成觀眾首選《棟篤特工》，顯出《我的情敵女婿》完全唔入流。先利益申報，《我的情敵女婿》我係揸住換票證入場，即是唔免費都未必入場睇嗰種。但如果你逼我二揀一請我免費睇，我諗仍然選擇後者，傳統賀歲片始終有種情意結，而我亦不是子華神fans。葉念琛大導演應該最趕客吧，日日俾人笑佢MK活地阿倫。我諗我算幾有資格批評葉大導，因為本人未看過他曾幾何時最受歡迎的方力申鄧麗欣愛情系列，只看過兩年前的《十月初五的月光》。睇完我鬧到狗血淋頭，延續唔到經典都算，問題係真係拍得好難睇好核突。之但係，今次《我的情敵女婿》我想讚。

.

賀歲片最緊要都係夠好笑，呢部戲係完全做到。我唔知其他人笑點高低，可能你堅持姓葉的就係拍爛片唔肯放鬆個人去睇，至少阿叔我笑得出都算由頭到尾哈哈哈。套戲一開始其實都有危機，泰臣用佢超舞台劇式演技客串，表情誇張扮好笑睇到人好尷尬。不過算，反正冇期望。點知盧海鵬羅蘭JoeJunior一段，寫得好演得好拍得好，成功帶起個氣氛令觀眾熱好身，為往後劇情打好心理基礎。接著都係好密集無悶場的劇情，整體係滿意有凸。

演員其實都揀得好好，衛詩雅係我過去一年大讚的女演員今次又係出色，任達華感覺上好多戲種都演得，反而好奇劉嘉玲做喜劇會係點？證明件事無錯，因為劉嘉玲在戲中跟本唔係去搞笑，係為部戲增加情感實感。想講就係劇本安排得唔錯，唔好意思又係葉大導功勞，因為今次他包辦監製編劇導演三職。搞笑演員負責返搞笑，正經演員將部戲加添返點意義。始終係賀歲片我唔敢話套戲點樣有深度，但係你會發覺係有一點意思，就好似早幾年曾志偉領軍的《我愛香港》系列有相當情懷。
.
你睇個plot，係誇張呀好似阿媽同個女爭仔，但係衛詩雅跟任達華開始認識再發展的過程好似離奇不過其實又交代得幾詳細幾自然，見家長鬥戲又係精彩，兩老話當年總令人覺得幾可惜。不過，要彈係好多位可以彈。例如結尾收得太快太急，不過念在前面寫得夠順夠詳細就不太計較。而唐詩詠姜皓文一對接近係無鋪排，勉強家有囍事式拉埋天窗。最離譜係方力申，未到中場就閃人冇再出現過！感覺好似拍拍吓唔夠時間求其搵個理由退場，直至映後片段先出來搞笑幾分鐘。浪費了王菀之，雖然演得可愛好笑但其實對劇情無太大作用，期望她演藝畢業生無工開的困境發展下去有出路，可惜為背景開了頭沒有打算作解釋收結。點講都好啦，唔要求如何精密複雜結構，呢套係有驚喜嘅。
.
多謝 Movie Express電影速遞 & 英皇電影Emperor Motion Pictures 送換票證
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

#我的情敵女婿

【#Nj評《戰雲密報》】被特朗普指『名過其實』的梅姨大反擊

這部戲不用說，點講都係睇大卡士，梅麗史翠普+湯漢斯+史提芬史匹堡，只要不是拍得好差都會贏。當然電影就是拍得好看，不過未去到可以講話『劇力萬鈞不能錯過』。有時判斷一部電影好唔好睇，真係好睇時勢。假如電影出現的年代是管治極度自由開放，若故事內容警世但看似天方夜譚，當時未必吸引到人注意，但日後幾十年後回首隨時成為神作。倒轉如電影瘋狂側寫時弊，以另一個故事描述現今環境，有可能好吸引觀眾眼球，感覺到共鳴有人幫自己出了一啖氣。想起《十年》，很老實個人其實諗唔通成品整體過人之處，賣的是一個想法，得到了香港電影金像獎『最佳電影』。

.
聽講話套戲只有十個月時間籌備就去馬，然後搵梅姨做女主角，明顯係急住向美國總統Trump開戰。心水清都記得一年前當時候任總統Trump瘋狂跟梅姨隔空開戰，一個就頒獎禮上不點名指對方排外及歧視，一個就twitter話對方名過其實。他們間在現實的對立關係完全反映在劇情之上，荷里活先前大量紅星罕有群起反抗Trump又提供大量花生。故事關於言論自由出版自由，又係Trump反美國核心價值備受批評的一環。講來講去，電影就不停令你把現實聯繫，矛頭指向現今困境。個人認為，此舉簡直超越借古諷今，基本上現實情緒已蓋過歷史故事本身。

《戰雲密報》結構是分明的前後兩段，上半完全是人物背景介紹，去到中段才開始觸發事件。關於介紹人物的一部分頗長，講真係有少少悶，因為睇好耐都好似未到重點，但我又要講聲此段對往後角色心理衝突的確係有重大幫助。無前面你就唔知梅姨背負家族祖業的壓力，背負市場股東的期望，背負讀者的信任。反而湯漢斯報社總編一角的內心沒有梅姨來得複雜，唯獨個人與權貴早有交情，但他的責任本該如此，要與時間競賽出版係能力上的卓越表現。電影講的傳媒業令人想起港產《導火新聞綫》，為公義揭露秘密文件又好似《斯諾登風暴》。大體故事脈絡其實都在想像之內，有人洩密，有人想報導，有人被禁制，有人以身犯險，有人突破壓力，有人嬲嬲豬，有人上庭，有人贏官司，結局光輝戰勝政府為媒體業帶來鼓舞BBQ。欣賞史匹堡，沒有過份的"劇情需要"，由人性出發一樣可以觸動情緒。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan