【#Nj評《悟空傳》】－甩繩馬騮誓要逆天打破維穩機器

我係 Derek Kwok 郭子健 導演fans
早幾日睇試映見到真人有得合照開心死我
香港電影未來郭導真係佔好重要一席位
識得好好平衡商業先有持續發展，純文藝社會寫實難啲
〈悟空傳〉唔係西遊記(好重要所以講一次)
所以唔存在「又西遊？今年幾多部西遊？」
無取經，但有熟識的人物
話係「前傳」又不對，因為有完全不可能接下去「正傳」的結局
取材自同名內地神級網絡小說，再大幅修改人物情節
睇到導演及香港班底投入的社會意識
有人弄權欺壓，有人不服天命，有人覺醒反抗
堅守過往作品帶出的熱血亢奮無畏無懼
一路殺上去，郭子健仍然是郭子健
不過劇情連結略失準，分開段落觀感不錯
但宏觀故事便欠一氣呵成，氣氛凝聚不暢
初段亦加入過時笑料，看得有點令人尷尬
真係要大讚打鬥畫面處理，郭子健黃智亨玩到盡
畫面慢鏡極風格化，final battle進入即時戰鬥模式
充滿電玩動漫英雄電影感，娛樂性爆炸
#余文樂超型
#彭于晏終於有發揮
=
*追蹤instagram【 madman.movie 】有你著數！
*// https://www.instagram.com/madman.movie/ //
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評《鄧寇克大行動》】還以為是"賓虛"般史詩經典... 只怪路蘭對觀眾太有信心

大導演新片上畫，定必引來全球注目討論。Christopher Nolan被現今影迷譽為神級大導，他的《黑夜之神》三部曲肯定就是英雄片經典，而其他近年作品如《潛行凶間》《星際啟示錄》都在商業及評價上取得大成功。即使連《鄧寇克大行動》未正式上映已被很多人期望成為神作，試映後的少少批評總會獲還未觀看的死忠想盡理由力撐！根本這部電影公映就標誌著大混戰的開始，我現正宣佈加入這場三年一度路蘭戰役。究竟好唔好睇？幾好睇。神唔神？我反問，假如『神作』的定義這樣闊，這個世界的神作應該會多到看不完？說罷，我應該準備被批鬥了...

【#Nj評《建軍大業》】打得好睇，人物多到同《權力遊戲》有得揮

（唔好又話我係咁宣傳套戲，一蚊都無收過）

（純粹用電影角度講兩句，麻煩唔好太政治去攻擊）
===========================
又係『主旋律』電影，不過睇得出近年呢類電影係有少少改變
《建國》三部曲頭兩套睇個樣咁悶，完全無興趣
但係早兩年《智取威虎山》其實拍得幾好睇架，係解放軍背景睇唔慣咁解
上個月《明月幾時有》都ok，仍然係許鞍華風格主導，少少牽涉中共帶領抗日意味
而今次肯定係這幾套戲裡面最"紅"的一部片，直接講共產黨國民黨之戰
Nj理科出身，中國歷史知識只去到中三，何況已經還返所有俾老師
所以電影頭半小時講背景，節奏去得超快，人物多過《權力遊戲》
我完全跟唔到，車尾燈都只係勉強看見，係我錯，讀書少，唔識嘢
唔係好清晰知道講乜，總之就話國民黨背叛革命，共產黨要實踐孫中山先生抱負啦
嘩，紅到你，呢個就係最大政治爭拗位，究竟邊個黨衰先？
我唔知啦，都話對歷史唔熟悉

【#Nj評《猿人爭霸戰：猩凶巨戰》】取巧的"大戰"不減偉大政治領袖凱撒的魅力

我想講，我真係好鍾意《猿人爭霸戰》前傳終結篇《猩凶巨戰》。正常人睇到戲名（包括我），原本都打算睇返一場人猩大戰，雙方損傷無數猿人含淚勝仗之類。就在看戲當天獲朋友告訴本集悶得離譜，瞓著兩三次，我頓時調節心情亦相信件事冇咁簡單。其實一切都有跡可尋：第一集講凱撒獲得智慧，描寫他具領導群猩潛能，同時跟主人建立不可分離的感情，要回歸大自然並不尋求反擊支配同族的人類。第一集驚喜處處，把起源故事好細緻地描繪，猿人智慧層層遞進。第二集講真故事就唔係好記得清楚，個人感覺未如普遍超好評價，但沒有忘記兩大重點－同類背叛及堅持不發動戰爭。以前未識嘢，但經歷香港幾年政治洗刷，我終於知道用比較現代語言形容就是『騎牆搵著數』同『左膠』，一邊嚴防『奪灰』一邊叫喊『邊個衝就係鬼』。再簡單講，這個系列根本就係個人傳記電影，講述政治領袖凱撒的一生。由贏在起跑線至上位成為首領，心懷偉大理想偏偏助長內憂外患，到本集終於大器晚成要承認世途險惡，決意為民族家庭拼死一戰。

【#Nj評《蜘蛛俠：強勢回歸》】戰衣太強搶風頭，任何人得到都可成為大半個蜘蛛俠...

寫文講Marvel電影壓力十分之大，覺得好好睇大讚就好地地，稍為感覺一般有少少挑剔就好驚引起罵戰。所以有必要主動申報本人絕非蜘蛛俠原著fans背景，此刻都係以一個普通觀眾看電影的心態去寫影後感，以下內容如有得罪，請大家多多包涵。Marvel系列之中，我最喜歡的電影有兩部：《蟻俠》及《美國隊長3：英雄內戰》。前者帶來意想不到的趣味，後者為英雄電影登上新高度，要有新角色加入之餘再講清一班戰友之間的立場上分野，高手示範。由細睇到大的蜘蛛俠回歸大家庭當然興奮，但亦持觀望態度，心底裏大銀幕形象已成型，無辦法。當好多人話《蜘蛛俠3》跟《蜘蛛俠：決戰電魔》很爛的時候，我仍然覺得非常好睇。係有一些安排不當，太多奸角同時出現，大佬虛有其表，但當中的故事我依然覺得入腦好看，經典場面不缺。來到新一代《蜘蛛俠：強勢回歸》，電影方向大幅轉變至青少年煩惱，的確是突破過去十多年的結構框架，在大男人當道的Marvel電影宇宙中作出有趣的嘗試。

【#Nj評《今晚打喪屍》】小平反：唔係要大讚，但冇你哋講到咁垃圾！

我唔鍾意每逢港產片本土片就話要大讚，但都希望盡量入場支持製作團隊努力，好唔好睇係另一回事。港產光環從來對我來說都不存在，但我承認會基於資源上輸蝕酌量將要求降低。《今晚打喪屍》的網上討論激烈，極多負評，留下大量『爛片！』『垃圾！』『唔知拍乜！』『你識睇條毛！』。入場前大概有定心理準備，將會看到一部浪費時間的電影。結果又無想像中咁爛喎，點都好睇過《變形金剛5》先啦！當然勝過這部已被世人唾棄的機械人片唔值得慶賀，《今晚打喪屍》亦未去到好好睇級別，但其實未算好差啫。我經常會話，每部電影都有佢有價值的地方，所以《變形金剛5》我夠膽仍俾40分"高分"。《今晚打喪屍》如是，我在看電影過程當中搵到趣味，係好多粗疏位，但不至於是『垃圾』。