【#Nj評《變形金剛：終極戰士》】奉勸各位男士：千萬不要帶老婆去睇，肯定家變

『走火入魔』四個字已經不足以形容導演Michael Bay，第四集《殲滅世紀》我最多只係覺得唔好睇好無聊對劇情完全留不下印象，今次睇完《終極戰士》問自己：我究竟睇咗啲乜？當日聽到消息話《變形金剛》打算發展世界觀要拍多10部雖然已經心知不妙，但講到叫齊一班犀利編劇聚首一堂形成十幾個聖經級劇本，我都唔否認仍然有些少期望能扭轉劣勢。但係結果就係繼續爛，還是比以前更爛，Michael Bay完全不打算把故事說好都意料之內，連動作場面都虛有其表揸流攤交行貨。
.
簡單講腦殘劇情：博派每集救地球，但到下一集又會俾人類追殺，仲當地球係屋企？新生代女角本來算吸引，點知完全無深化亦對整場戰役毫無用處。硬要佢同男主角懶有意思對話，相處短短一場戲就扮有感情當觀眾真係咁膚淺。廢車場避難的博派瘋狂Trash Talk難頂過啲狂派，搵唔到套戲重點之餘仲要聽大量廢話越來越燥，足足廢足1個幾小時先踏入故事主線... 以為有點起色，但危機大揭發10分鐘唔夠就講完，我都未清楚發生咩事班主角就跑跑跑逃難搵寶藏，好似好緊張但觀眾絕對好難跟。男主角首次見到C3PO前明明被軍隊追殺中，一路幾隻博派保護走佬，點知後來去到英國得返大黃蜂跟隨，其他人完全無影。最好笑是，原來成班博派係返咗去廢車場休息抖涼，英國打得正起但佢哋繼續吹水過日晨！頭先班軍人唔係發現佢哋隱藏地點而展開追捕咩？佢哋咁愛回家無咗回事？我問咗自己好多條問題，但一條都答唔到。




柯柏文最後45分鐘先正式出場係極大敗筆，亦可能因為柯先生太遲現身恐怕觀眾唔知佢係邊個，不斷自我介紹『I am Optimus Prime』，打前打後不同時間係咁講。明明以前每次聽到呢句對白都覺得型到肅然起敬打冷震，淪落到而家成為充滿膠味大笑話真係可悲。麥加登領導的奸角群，無性格無深刻，淪為女皇旗下嘍囉小丑，俾柯柏文一腳踢落街就好似火箭兵團飛上天，下集再見。有人話無劇情唔緊要睇下特技咪得囉，從前出名拍攝大場面有一手的Michael Bay，都把所有畫面拍得毫無美感超混亂。睇唔清變形細節，唔知邊個打邊個，以上問題再加上動作場面零碎胡亂湊拼扮緊張就真係令觀眾受苦。終極大戰一段，幾條線不停交替出現花呢花碌。得閒講紳士阿伯被炸飛，得閒講軍佬飛上平台唔知打咩，得閒講有個科學家諗計，得閒影條三頭龍飛來飛去齋睇唔打食花生，得閒影不知哪來的子彈火光橫飛，得閒影軍佬左閃右避，得閒睇下班憑空跳出來的牛頭怪合體又解體，得閒又話好危險軍佬要撤退，得閒話炸cybertron某個位就好似可以解決問題。這些都在短時間內不停閃現發生未睇清就下一個鏡頭，只是配上嘈吵配樂想令人感覺緊湊，但畫面之間沒有關係各自獨立存在似trailer，欠缺共同目標又炒大雜錦的大戰看之無味。
.
老實講，將《變形金剛》宏觀放入圓桌騎士歷史背景可接受，起頭中古大戰還拍得有睇頭，涉及傳統血統繼承元素係可以將故事包裝得貫穿古今接連外星神秘力量都講得通。但本作就明顯無想辦法把故事表達好，只為鋪墊導演眼中想出現的一些重頭戲放炸藥。導演亦似乎忘記《狂派再起》的教訓，再次把整個戰場調離到荒蕪之地，遠離城市與我何干，涉及地球之戰亦只得100人不夠參戰，好難怪觀眾不能代入。遲遲不肯進入主線，連懸疑感都缺乏，寧願花大量時間落無意思無趣味的閒談之上令人等到非常唔耐煩。好肯定，訓一覺醒來都不會錯過任何劇情。拜託還我真心好笑甚至黃色笑話都不介意，純娛樂好過多面不討好為世人所唾棄。睇《終極戰士》睇到後悔想走的感覺，就只有《蝙蝠俠對超人》可以帶到俾我，任你無限調節底線都難以滿意這部作品，功力之強確實唔簡單。奉勸各位，生命可貴，無謂貼錢買難受，睇完一定後悔。
.
40分
文： Nj
.
*追蹤instagram【 madman.movie 】有你著數！
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

【#Nj評《原諒他77次》】愛情死亡筆記-77次限額一過感情就會消散

《原諒他77次》是邱禮濤x李敏本年第三擊，三部作品是三類截然不同的戲種，劇情動作，鬼怪血腥，愛情浪漫。論邱式粗疏，《拆彈專家》跟《失眠》雖有好好的嘗試，但亦有不少不合理令人發笑的漏洞，而《原諒他77次》算是比較平和穩陣的一部作品。這部電影從主角Eva的『原諒他77次』筆記簿內容倒序開展，道出她一次又一次原諒男主角Adam的故事。這個安排方便電影中插播不同時間發生的小事，二人之間的相處情況亦拍得很豐富，夠生活化的爭拗磨擦容易使觀眾產生共鳴。但這樣亦使故事出現側重過去忽略當下的情感，我們很難看到Adam在第77次犯錯分手後的心情有什麼推進，只有Mandy一線作為後續，結局前都沒有與Eva作更多的補救和決意改變的承擔。

.

論價值觀，自己就唔太認同電影主角Eva的心態。Heartbeat話要記低自己的心情我無意見，但普通錯誤就計算為『一次原諒』就畢竟太小事化大。遲到，飲醉酒，當然最好唔好發生，但這些對好多情侶而言其實都算很平常的事，講兩句『下次唔好』就會帶過罷就。但電影中Eva連這些都要記下來，耗用僅有77次的限額，真係唔知講乜好。與其話男方經常犯錯，不如問下究竟係咪Eva想迫自己盡快走上分手絕路？當然，Adam基本上係一個大仆街，成日控制唔到自己情緒又死唔為女朋友著想，Eva自己亦擁有強烈港女性格不停楚楚可憐搏人同情，以為自己係上帝有資格寬恕另一半的罪。如果按照她的標準去計算『原諒』上限，我諗至少要原諒70個7次再10倍先滿足到一般情侶。

衛詩雅真係一股影壇清泉，上回主演《失眠》已經交出表現，這次飾演照正路不受歡迎的配角Mandy一樣成功。雖然這角色像是一個狐狸精第三者，但劇本營造她的全心全意愛Adam，愛到自行送上門唔介意他心裡還想著前度女友，好好對照看似受害者的Eva對感情的不認真。初登場時，Mandy送上自己名字的生日蛋糕給Adam，並說：⌈我俾你食吖～⌋我肯定這是整部電影最精警的一句，語帶雙關，五個字講明Mandy一角的性格！精彩！她可以話係最佳女友的象徵，放下身段爭取幸福，不停受辱都唔在乎，執屋抹地打理家庭，煮飯等個男人返屋企。一個付出真愛，一個自甘墮落玩玩下，她越做得好越促使Adam思考自己是否真的愛這個女人。衛詩雅把Mandy演得出色，流露自然的愛意，沒有任何使人討厭的感覺，我甚至更想她與Adam能譜出真戀情，讓Eva後悔自己扮晒嘢懶清高。

.

這本貫穿電影的『原諒他77次』語錄記事簿，就好似愛情版死亡筆記，當被寫下需原諒的事件達到77次，感情就會消散。筆記本身不會殺掉愛情，一切視乎擁有者的造化。每一次動筆，都具放棄愛情的勇氣。77次是規則，如何運用這77次的限額就要看關係之間的男女有幾重視對方。磨合永遠是二人之間相處很重要的過程，經常把『我原諒你』『你對唔住我』掛在口邊沒有建設性，花時間想想如何為對方行多一步，盡力把『原諒他77次』筆記本保持空白才有意義。

.

75分

文： Nj

.

*追蹤instagram【 madman.movie 】有你著數！

*讚好專頁【 電影狂人-影評情報交流平台 】緊貼最新電影資訊！***

－－－－－－－－－－－－－－－－－－

░電影資訊 ░獨家影評 ░幕後製作 ░戲院優惠

Fb專頁【 電影狂人-影評情報交流平台 】

http://www.fb.com/MovieMadMan

.

狂人點評《黑豹》預告

早幾日《#黑豹》先導預告公開，創下24小時內8900萬次的觀看紀錄。版主Nj對於《美國隊長3：英雄內戰》中首次登場的黑豹有好好印象，電影用了簡短篇幅便能把這位新英雄的討好性格背景介紹給觀眾。但看完《黑豹》獨立電影預告後，有點擔心。
.
本身不是漫畫fans，我對所預期的非洲國家形象在片段中藏著大量前衛高科技感到不現實。就好似地球版《雷神》，強行創造奇觀，本質上看不到分別。雖然一日未到上畫特技仍有調整空間，暫時電腦畫面確實假得十分離譜，場景如是人物如是。即使是『野外』場面，是好明顯的廠景拍攝，欠距離感，好局限又無大自然味道。
.
當然暫時透過預告看到的只是一些視覺設定，可能故事好好看的。期待《黑豹》下一條預告，能告訴觀眾更多劇情的吸引之處。You are a good man, with a good heart. It is hard for a good man to be a king. 識玩，劇本可以好好玩。#迷人PinkPanther #唔好令我失望
.
預告連結：
https://www.facebook.com/MarvelStudioTaiwan/videos/vb.173496109436797/1324154207704309/?type=2&theater

【#Nj評《沙灘拯救隊》】唔好笑唔緊要，最緊要好波！

今時今日，老闆最想伙記十項全能乜都識一個打幾個，但現實係做好本份已經好難，仲要兼顧幾廿樣無謂嘢真係唔怪得返工嗌救命。但睇完《沙灘拯救隊》，你會發現裡面班救生員真係老闆最愛打工仔最佳示範，唔單止自己責任做足一百分，而且好得閒四圍Chit Chat搞關係，仲撈埋差佬職責，查案大戰毒梟，犀利。對於萬能主角就諗起TVB劇集，《ID精英》講海關都會有槍戰，《飛虎》個世界乜事都要出動飛虎隊，可能包括救貓。我印象中，好多救生員戴住副太陽眼鏡就坐在高塔訓覺，有時仲會中中下失平衡跌落街... 幾咁大對比，戲裏面每位救生員都係神一般存在，頭頂有光環，不論男女瘋狂慢鏡震波。更離奇情節包括：跑包尾都過到關入閘，肥仔可以溝到索女，總之就幻想天堂先會發生。

【#Nj評《神奇女俠》】終於似返套戲，太完整可能不合DC死忠口味

回想當日睇《蝙蝠俠對超人：正義曙光》，我嬲到影評都無寫。係唔想浪費自己時間去鬧，因為你鬧幾多次DC粉都是話你膚淺，睇唔明當中始於原著的細節。係呀，我真係唔識欣賞，但亦多得《BvS》使我對DC期望跌至歷史低位，《神奇女俠》帶來的感覺好似神作般降臨於世全民皆讚。DC真係識玩，俾三啖屎你食，再來一啖砂糖就足以令你對年尾上畫的《正義聯盟》重拾信心乖乖入場。